Va agora tres años, en 2007, echábemos andar la primer versión de Puertu Asturies. Dende entós p'acá yá llovió (y más nestos dos últimos años que paecen emperraos en contradicir lo del calentamientu global). Así que pensemos que yera hora de parar un poco, poner una cara nueva a esta páxina, ponela colo más moderno y facer "resetéu" xeneral.

Quiérase o non, nuna páxina d'estes carauterístiques, como nos pasa colos nuestros ordenadores, aquello va enllenándose de muncha broza. Hai más de mil doscientes persones rexistraes, pero ¿cuántes realmente usen esta páxina? menos, claro ta. Hai muncha xente que la usa, pero non mil doscientos.

De la mesma manera, ensin querer, esto foi enllenándose de ficheros que nun sabemos mui bien a cuentu de qué tán equí, y les noticies de va tres años diba siendo hora que les esborráremos.

Así podíremos siguir, pero val más nun allargase.

Por eso vamos poner tolos contadores a cero. Como podréis ver, les más de cientu diez mil visites que dicía'l contador, tornen nunes poques, entamamos como de nuevos. Y lo mesmo colos rexistros. Dende la fecha de güei volvéis tar toos ensin rexistrar. Sabemos que ye un poco fastidioso, pero así vamos enteranos otra vez quien somos y onde tamos. Remembrái que si queréis baxar de les descargues tenéis que vos rexistrar con corréu EDUCASTUR.

Tolos xuegos, descargues y demás siguen (esperamos) funcionando como siempre.

Un saludu y a disfrutar d'esta "nueva" páxina.